青冰: 爆冷之後會點走?
17/2/2017 10:01:00 [華富新聞]

爆冷之後會點走?

吉利(0175)爆冷染藍,可算係錦上添花,去年升幅79%未算誇張,今年只係三十幾個交易日,已經升咗五成。早前坊間話咁升法係想挾死輪商,焗佢地追貨,令升勢更急,抑或係有春江鴨早知地入恆指呢?都不重要了,後市點行先有意思,睇番過去三年染藍的股份,蒙牛(2319)、領匯(0823)、長江基建(1038)及瑞聲(2018),全部都在正式納入指數後個零月內見頂,瑞聲更係5日內見效,雖然佢調整三個月後重拾升軌,不過跌幅都愈25%架,如果戰友真係追入吉利,上車後就必定要嚴守止蝕喇。

深港通實施之時,講過話半年就會檢討港股通名單,市值將會用去年每個月底市值的平均數,50億以上就合格,青冰用bloomberg掃過,發現幾隻心水股份都在其中,分別係IGG(0799)及中國龍工(3339)。

本欄在12月底推介過IGG,當時話要等策略投資者IDG批埋手上的股先入貨,不過12月時市況甚劣,IGG的殺著遊戲王國紀元咁賺錢,股價都要由6.66隊到5蚊,批股根本係渺茫,同冇可能,近期股價反彈到六蚊樓上,疑似IDG的經紀麥格理證券都有減持咗五球股,都係個句,佢肯批,戰友就要入貨,如果夠勇嘅,呢啲位買,搏佢跟科網龍頭騰訊(0700)一齊炒上,有力挑戰新高。

至於龍工(3339),青冰上周在其他專欄推介過,原因不贅了,有興趣就自己search下吧。

近期中國經濟數據有好轉跡象,出口及PPI都靚仔,有行家早前同恆隆高層吃飯,佢地話國內零售明顯好咗,咁另一心水股百盛(3368)似乎都會受惠喎,佢地星期一就公佈業績,揸住9億特殊盈利,希望派息會鬆手啲,助戰友財息兼收啦。




股票資訊由天滙財經提供 免責聲明